MGA TIGMO-TIGMO (RIDDLES) SA INOPACAN

Niadtong wala pay kurente sa Inopacan, ang mga bata magtapokay (bisan na mga hamtong) aron magtag-anay og tigmo. Bida gyud kaayo ang makauna og hatag sa ensakto nga tubag. Seguro makahinumdom mo ani kung inyong basahon ang mga mosunod nga mga tigmo.

Ang dili makatubag moingon na lang intawon nga "surender ko" para tug-anan na lang sa tubag (kana kung ihatag sa nagtigmo)

1. Sa gabii bukharon ingon og dahon; sa adlaw murag tinustos kay rolyohon. (Unsa man!!!?)

2. Kaban sa pari, kung ablihan dili na mauli. (Unsa man!!!?)

3. Lungon ni lolo, ang sulod nga patay daghan kaayo. (Unsa man!!!?)

4. Sa layo pa mura'g motor; sa duol na mura'g doktor (Unsa man!!!?)

5. Lampin ni Maria, ilabog lang kay walay laba-laba (Unsa man!!!?)

6. Ulo ni Maria may korona; unya daghan pud siya og mga mata (Unsa man!!!?)

7. Ulo ni Pedro; ang sulod puro bato. (Unsa man!!!?)

8. Mitago si Pedro; pero migimaw ang ulo. (Unsa man!!!?)

9. Motindog ko; mohigda siya. Mohigda ko; motindog siya. (Unsa man!!!?)

10. Kung moadto ko, moadto pud siya; Kung asa ka; tua pud siya (Unsa man!!!?)

11. Walay ulo pero nagkalo lagi; wala molarga o magsakay, pero moagi (Unsa man!!?)

12. Adunay nawong pero walay mata, ilong, ug baba; Walay tiil pero modagan (Unsa man!!?)

13. Kabayo ni Juan sige lang og kaon, pero dili modagan (Unsa man!!!?)

14. May duha ka guwardiya sa duha ka langub nga magsige og sulod-gula o mang-ung-ong (Unsa man!!!?)

15. Ang anak nagpungko lang, samtang ang inahan nagsige pa og kamang (Unsa man!!!)

16. Kung maglakaw sa buntag, upat ang tiil; inigkaudto, duha ang tiil; ug inigkahapon, tulo ang tiil (Unsa man!!!)

17. Kamote sa Leyte bahong iti! Sa ilawom paniti (Unsa man!!!?)

18. Um-um lang ug um-um; Dili mahurot kay dili man matulon (Unsa man!!!?)

19. Dakong itlog, tam-is ang sabaw; makabusog. (Unsa man!!!?)

20. Ang gatas isalibay; kay unod ra ang kan-on og tiunay (Unsa man!!!?)

21. Dili langit o kawanangan pero may mga adlaw ug mga buwan (Unsa man!!!?)

22. Daghang tawo, pero mingaw (Unsa man!!!?)

Puwede usohon nato og usab aron mabuhi og balik ang kanhi kalingawan sa wala pay internet games ug social networking. Hala, puwede baya ipadala via text ning mga tigmoa aron ma-challenge ang utok og paminsar kung unsaon pagsulbad ang mga tanghaga nga nagpaluyo sa mga analogies ug symbolism sa mga tigmo. Mura ni og karaan nga crossword puzzle sa mga Inopacnon.

Hala sige, kung ganahan ka, dugangi pa og salmot ning mga tigmoa!

Kadtong mi-surender na kay di jud tawn makatag-an, kalingawi na lang og pindot nang "Older Post" link sa ubos hangtod moabot ka sa "Tubag sa mga tigmo" 

Related posts

• Kirby Asunto is a niece of Manny Pacquiao's cousin who hails from Inopacan, Leyte
• Kirby Asunto - anak sa usa ka Inopacnon
• Hinup-akan is the true origin of Inopacan
• The Legend of Inopacan (in my years of research)
• Inong Pak-an Festival (2009) - Youtube video
• Cuatro Islas - the Boracay of Leyte (as reported by GMA Saksi news report) 
• Digyo island
• Apid island
• Himokilan island
• Mahaba island

 

Tubag sa mga tigmo

Back to TIGMO-TIGMO UNSA MAN!? 

1. banig (bukharon sa gabii aron katulgan, irolyo inig mata aron hiposon) 2. itlog (dili na gyud ni mauli kung mabuak na) 3. posporo (ang mga bilog sa posporo gipareho ingon og mga patay nga gisulod sa usa ka dako nga lungon) 4. lamok (ang tingog kung maglupad-lupad paduol mura og motor, kung makapaak ingon og ineksyon sa doktor) 5. puso sa saging (mangahulog na man lang gud ang panit sa puso sa saging) 6. pinya (ang pungpong sa tangkay ibabaw sa bunga sa pinya maoy korona, unya daghan pud og mata and bunga) 7. bayabas (aw, kasabot ka na ani nganong batoon ang sulod) 8. lansang (mogimaw gyud ang ulo ani) 9. lapa-lapa sa tiil (himatikdi kuno ni kung motindog o mohigda ka) 10. anino (aw, dili gyud mo magbulag hangtod sa hangtod) 11. ballpen (ang takob maoy kalo, and sulat ani maoy agi) 12. relo/orasan (may nawong pero dili pareho sa ato, unya moingon man ta nga midagan na ang oras) 13. kagoran (kasabot kana kung ngano nga dili modagan bisan sigehan og hungit sa kagdunon) 14 sip-on (niadtong bata ka pa, di ba singhot ka lang ug singhot sa nag-ung-ong mong sip-on) 15 pakwan (puwede pud ang kalabasa, and bunga maoy anak unya ang ganas o punoan maoy nanay) 16 tawo (obviously from Greek mythology where the half-lion and half-man Sphinx sat outside of Thebes and asked this riddle of all travelers who passed by: "What goes on four legs in the morning, on two legs at noon, and on three legs in the evening?"); 17 batikulon sa manok (mao man ni ang gigikanan sa mahimong iti sa ginhawaan sa manok, unya kung imong ihawon ang manok, ang batikulon pikason gyud unya hiwaon aron panitan sa kubalon ani nga putos sa ilawom); 18 dila (sukad sa sukad di ba sige ka lang og um-um sa imong dila pero di gyud nimo puwede tunlon, di ba?); 19 butong (gisusama sa dakong itlog ang hitsura aning bunga, tam-is ug lamian gyud kaayo ang unod ug sabaw niani. Segurado mabusog ka sa usa lang ka butong); 20 nilun-ag nga bugas (til-ogan man gyud nimo una ang bugas, unya ilabog ang sabaw nga gigamit sa paghugas sa bugas aron puwede na nga lutoon ang bugas para mahimo nga kan-on); 21 kalendaryo (naa lagi ni mga buwan (months) ug mga adlaw (days) pero wala gyuy langit; 22 sementeryo (di na man seguro kinahanglan pa nga i-explain nganong mingaw man ning lugara bisan og naa daghang tawo nga gipanglubong)

Back to TIGMO-TIGMO UNSA MAN!?